Туяа эмчилгээний 2 аппарат ашиглахад БЭЛЭН болжээ

2016 оны 04 сарын 20

Монгол Улсын Их Хурлын дарга З.Энхболд, Монгол Улсад албан ёсны айлчлал хийж буй Бүгд Найрамдах Энэтхэг Улсын парламентын Доод танхим /Лок Сабха/-ын дарга хатагтай Сумитра Махажан нар Хавдар судлалын үндэсний төвд ажиллалаа. Парламентын дарга нар Бүгд Найрамдах Энэтхэг Улсын Засгийн газраас тус төвд хандивласан зайн туяа эмчилгээний “Бабатрон II” аппарат, туяа эмчилгээний төлөвлөлтийн симулятор аппаратыг ашиглалтад хүлээлгэн өгөх арга хэмжээний нээлтийн ёслолд оролцсон юм.

Бүгд Найрамдах Энэтхэг Улсын Ерөнхий сайд Нарендра Моди 2015 оны 5 дугаар сард Монгол улсад төрийн айлчлал хийхдээ Хавдар судлалын үндэсний төвд дээрх хоёр аппаратыг хандивласан. 2015 онд Бүгд Найрамдах Энэтхэг Улсын “Панацеа Медикал техноложис” компанид үйлдвэрлэсэн эдгээр аппаратыг хоёр улсын инженер, мэргэжилтэн хамтран суурилуулж, туяа эмчилгээнд ийнхүү ашиглахад бэлэн болгосон байна.

Туяа эмчилгээний төлөвлөлтийн “Имэжин” энгийн симулятор аппарат нь рентген харалтын тусламжтайгаар хүний биед байгаа хавдрын голомтыг цаг алдалгүй оношилж, эмчилгээ хийх нөхцлийг бүрдүүлдэг байна. Харин зайн туяа эмчилгээний “Бабатрон II” аппарат нь хүний биеэс тодорхой зайд байрласан цацраг идэвхит Кобальт-60 үүсгүүрээр гарч байгаа гамма цацрагаар хорт хавдрын эсэд үйлчилж, эсийн хуваагдлыг сааруулах, зогсоох өвөрмөц эмчилгээг хийдэг юм байна.

Туяа эмчилгээний эдгээр аппаратыг ашигласнаар хорт хавдрын үйлчилгээг сайжруулах, туяа эмчилгээг хүлээгдэлгүй, шуурхай хийхэд том дэмшил авчирч буйг Эрүүл мэнд, спортын яамны Төрийн нарийн бичгийн дарга С.Ламбаа онцлон тэмдэглээд Бүгд Найрамдах Энэтхэг Улсын Засгийн газар, Монгол Улсад суугаа Онц бөгөөд Бүрэн эрхт Элчин сайд ноён Сомат Гош болон хамтран ажилласан бүх хүнд талархлаа илэрхийллээ.

Хавдрын эмчилгээний хоёр хэмжээст төлөвлөлтийн “Имэжин” энгийн симулятор аппаратаар өдөрт 2-3 хүнд, жилдээ 300-400 өвчтөнд оношилгоо хийнэ. Харин зайн туяа эмчилгээний “Бабатрон II” аппаратаар толгой, хүзүү, тархи, улаан хоолой, уушги, хөх, умайн хүзүүний зэрэг хорт хавдрын зайн туяа эмчилгээг өдөрт 30-50 хүнд жилдээ 600-800 өвчтөнд хийх боломжтой гэдгийг Хавдар судлалын үндэсний төвийн ерөнхий захирал Л.Төмөрбаатар танилцуулсан.

Бүгд Найрамдах Энэтхэг Улсын парламентын Доод танхим /Лок Сабха/-ын дарга хатагтай Сумитра Махажан өнөөдрийн энэхүү арга хэмжээ хоёр улсын хамтын ажиллагаа салбар бүрт өргөжиж, бодит ажил хэрэг болж буйд талархалтай байгаагаа илэрхийлээд хүн амын эрүүл мэндийн төлөө хөрөнгө оруулалт хийх нь юу юунаас илүү чухал болохыг хэллээ.

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД
202.126.88.34 Аюулт өвчнөөс олон олон хүн ангижрах болтугай. Тусламжийн гараа сунгасан буянтай үйлс хийж байгаа ачтан хүмүүсийн буян нь дэлгэрэг.
202.131.234.243 ашгүй дээ монголд эмчилж чадахгүй байсан эмчилгээнүүдийн нэг шүү дэээ